Ýurdumyzyň ýokary, orta-hünär okuw mekdepleriniň talyplarynyň we mekdep okuwçylarynyň arasynda “Software.Hack” atly hakaton bäsleşigi geçiriler

   Ýagşygeldi Kakaýew adyndaky Halkara nebit we gaz uniwersiteti 2025-nji ýylyň 9-10-njy oktýabrynda ýurdumyzyň ýokary, orta-hünär okuw mekdepleriniň talyplarynyň we mekdep okuwçylarynyň arasynda “Software.Hack” atly hakaton bäsleşigini geçirýär.

   Hakaton bäsleşiginiň temasy: Kafedranyň we fakultetiň resminama işlerini awtomatlaşdyrmak üçin programma üpjünçiligini döretmek.

   Hakaton bäsleşiginiň ýumuşy Windows operasion ulgamynda dürli resminamalar (*.doс, *.doсx, *.xls, *.xlsx, *.ppt, *.pptx, *.pdf, *.bmp we ş.m.) görnüşindäki nusgalaryň (şablonlaryň) esasynda resminamalaryň köplügini döredip berýän programma üpjünçiligini ýa-da amaly goşundylary döretmekden ybarat. Gatnaşyjy bäsleşikde berlen ýumuşy programmirleme dilleriniň, gurallar serişdeleriniň islendiginde ýerine ýetirip biler. Gatnaşyjy talyba bildirilýän talaplara laýyk geýinmelidir.

   Gatnaşyjylaryň döreden programma üpjünçiligi aşakdakylary ýerine ýetirmelidir:

-giriş resminamalary okamak;

-okalan maglumatlary tertipleşdirmek;

-nusga (şablon) resminamalary seljermek;

-nusga resminamalaryny tabşyrylan ýumuşa laýyklykda doldyrmak we aýratynlykda ýatda saklamak;

-resminamalary çap etmek.

   Hakaton bäsleşigi toparlaýyn we ýekelikde hem geçirilip bilner. Topar 3 adamdan ybarat bolup, her toparyň öz toparbaşysy bolmaly. Her okuw mekdebinden ýa-da edaradan diňe 1 topar gatnaşyp biler.

   Gatnaşyjylar gönümel ýa-da uzakdan gatnaşyp bilerler. Uzak aralykdan gatnaşýan toparlar öz programmalaryny we olary ulanmak üçin ädimleýin görkezmelerini ugratmaly bolarlar (munuň üçin bulut tehnologiýalary, Google Disk we ş.m. peýdalanylmaly). Olaryň programmalary eminler toparynyň ädimleýin görkezmelerine laýyklykda synag kompýuterlerinde işe goýberiler.

   Bäsleşigiň ýeňijileri eminleriň goýan ballaryny jemlemegiň esasynda olaryň köplügi boýunça kesgitlenilýär. Hakaton bäsleşiginiň netijesi boýunça toparlaýyn görnüşde 1 sany Baş baýrak, 2 sany I orun, 3 sany II orun, 4 sany III orun berilýär. Bäsleşigiň ýeňijileri Hormat hatlar bilen sylaglanar.

    Has giňişleýin maglumatlar we bäsleşigiň düzgünnamasy.

Habarlaşmak üçin tel.:

39-14-57 (el.tel.: +99365-62-59-33),

39-13-36 (el.tel.: +99365-67-51-31),

39-13-18 (el.tel.: +99364-02-25-21).

E-mail: cmaksat@gmail.com