Ýagşygeldi Kakaýew adyndaky Halkara nebit we gaz uniwersitetiniň Geologiýa fakulteti 2012-nji ýylda döredildi.
Geologiýa fakultetinde Peýdaly magdanlary gözlemegiň we barlamagyň geofiziki usullary, Geologiýa we geohimiýa, Gidrogeologiýa we inžener geologiýasy, Dag işleri, Geologik kartalaşdyrma we markşeýder işi hem-de Çyzuw we materiallaryň garşylygy kafedralary hereket edýär. Fakultetde “Peýdaly magdanlary gözlemegiň we barlamagyň geofiziki usullary”, “Gidrogeologiýa we inžener geologiýasy”, “Nebitiň we gazyň geologiýasy”, “Gazylyp alynýan peýdaly magdanlary baýlaşdyrmak”, “Geologiki kartalaşdyrma we magdan ýataklarynyň gözlegi” hünärleri boýunça ýokary bilimli dag inženerleri hem-de “Dag işleri” we “Gazylyp alynýan peýdaly magdanlaryň geologiýasy we gözlegi” taýýarlyk ugurlary boýunça baklawrlar goýberilýär. Olar okuwlaryny tamamlanlaryndan soňra Türkmenistanyň Nebitgaz toplumynyň “Türkmengaz”, “Türkmennebit” döwlet konsernlerinde hem-de “Türkmengeologiýa” döwlet korporasiýasynda, ylmy-barlag institutlarynda, degişli pudaklaýyn dolandyryş edaralarynda zähmet çekýärler.
“Türkmengaz” döwlet konserniniň Ylmy-barlag tebigy gaz institutynda fakultetiň binýatlyk kafedrasy açylyp, talyplar bu kafedrada nazaryýetde alan bilimlerini önümçilikde pugtalandyrýarlar, ylmy-barlag we taslama işlerine işjeň gatnaşýarlar.
Fakultetde 2012-nji ýylda Geologiýa muzeýi döredilip, onuň esasy wezipesi talyplara bilim bermek işinde bar bolan görkezme serişdelerini ulanmak we häzirki zamanyň derejesinde geologiki bilimleri ýaýmak bolup durýar. Onda 1 müňden gowrak minerallaryň, dag jynslarynyň, paleontologiki galyndylaryň, magdanlaryň nusgalyklary saklanylýar. Muzeýde Türkmenistanyň ýer astyny yzygiderli öwrenmäge, sebitiň geologiki gurluşy barada täze maglumatlary almaga we nusgalyk daş materiallaryny toplamaga mümkinçilik döredildi.
Geologiýa fakultetiniň okuw binasynda häzirki zaman döwrebap enjamlar bilen enjamlaşdyrylan diplom we ýyllyk taslamalary, lingafon we kompýuter otaglary hem-de 15 sany okuw we ylmy-barlag işlerini alyp barmaga niýetlenen tejribehanalar bar.
Geologiýa fakultetinde Gahryman Arkadagymyzyň eserlerini, Hormatly Prezidentimiziň içeri we daşary syýasatyny wagyz etmek bilen, geljekki hünärmenleriň dünýä tejribesini öwrenmekligine, işläp taýýarlamalar baradaky habarlara, ylmy-usuly maglumatlara we ylmy-amaly barlaglaryň wajyp ugurlaryndaky innowasiýalara aýratyn ähmiýet berilýän gurnaklar hereket edýär.
Fakultetiň professor-mugallymlarynyň we talyp ýaşlarynyň alyp barýan ylmy-barlag işleriniň netijeleri tezisler we makalalar görnüşinde ýerli hem-de daşary ýurt žurnallarynda çap edilýär.
Şeýle hem, fakultetiň professor-mugallymlary we talyp ýaşlary halkara we döwlet derejesinde geçirilýän çarelere işjeň gatnaşýarlar.