Berkarar döwletiň täze eýýamynyň Galkynyşy döwründe hormatly Prezidentimiz Serdar Berdimuhamedowyň parasatly baştutanlygynda Türkmenistan Bitaraplyk, parahatçylyk söýüjilik, hoşniýetli goňşuçylyk, netijeli halkara hyzmatdaşlyk ýörelgelerine esaslanýan daşary syýasat strategiýasyny üstünlikli durmuşa geçirýär.

    Türkmenistan bilen Birleşen Arap Emirlikleriniň arasyndaky dostlukly gatnaşyklar köp ýyllaryň dowamynda özara düşünişmek, ynanyşmak, esasynda yzygiderli ilerledilýär. Häzirki wagtda halkara hyzmatdaşlygy iki taraplaýyn esasda, şeýle hem BMG­niň, beýleki iri halkara guramalaryň çäklerinde alnyp barylýar. Ýangyç­energetika pudagy Türkmenistan bilen Birleşen Arap Emirlikleriniň özara gatnaşyklarynyň esasy ugurlarynyň biri bolup durýar.

    Döwlet derejesinde ylalaşylan resminamalaryň esasynda Ýagşygeldi Kakaýew adyndaky Halkara nebit we gaz uniwersitetinde Birleşen Arap Emirlikleriniň Türkmenistandaky Adatdan daşary we Doly ygtyýarly Ilçisi Ahmed Al Haý Al Hameli bilen ylym-bilim ulgamynda ikitaraplaýyn hyzmatdaşlygyň meselelerini ara alyp maslahatlaşmak maksady bilen resmi duşuşyk geçirildi. Duşuşykda Ýagşygeldi Kakaýew adyndaky Halkara nebit we gaz uniwersitetiniň rektory Hormatly Prezidentimiz Arkadagly Gahryman Serdarymyzyň ýolbaşçylygynda ylym-bilim ulgamyny döwrüň talaplaryna laýyklykda kämilleşdirmek, ýaş nesle bilimiň soňky gazananlaryny öwretmek, innowasion tehnologiýalardan baş çykarýan ýokary derejeli hünärmenleri taýýarlamak üçin ähli tagallalaryň edilýändigini, şeýle hem ýurdumyzda “Açyk gapylar” syýasatynyň netijesinde türkmen-arap gatnaşyklarynyň gün-günden ösýändigi, uniwersitetiň fakultetleri, kafedralary, taýýarlanylýan hünärler we ugurlar barada hem-de uniwersitetde alnyp barylýan ylmy-barlag işleri, daşary ýurtlaryň ugurdaş ýokary okuw mekdepleri, Hytaýyň Milli Nebitgaz Korporasiýasynyň (CNPC) we Malaýziýanyň «PETRONAS» kompaniýasynyň Tehnologik uniwersiteti bilen ylym-bilim ulgamynda hyzmatdaşlygyň alnyp barylýandygy barada gürrüň berdi.

    Birleşen Arap Emirlikleriniň “Dragon Oýl” nebit-gaz kompaniýasy bilen Ýagşygeldi Kakaýew adyndaky Halkara nebit we gaz uniwersitetiniň arasynda baglaşylan Şertnamanyň esasynda birnäçe ýyllaryň dowamynda ylym-bilim we nebitgaz ulgamynda netijeli hyzmatdaşlyk edilýändigi bellenip geçildi. Uniwersitetde gaýtadan dikeldilýän energiýa çeşmeleriniň ylmy taýdan esaslandyrylan innowasion tehnologiýalarynyň işlenip düzülendigi we olary Birleşen Arap Emirlikleriniň “Dragon Oýl” nebit-gaz kompaniýasy bilen bilelikde önümçilige ornaşdyrmagyň meýilleşdirilýändigi barada durup geçildi.

    Birleşen Arap Emirlikleriniň Türkmenistandaky Adatdan daşary we Doly ygtyýarly Ilçisi Ahmed Al Haý Al Hameli gurnalan duşuşyk üçin uly minnetdarlyk bildirip, uniwersitetiň halkara hyzmatdaşlygy boýunça alyp barýan işlerine ýokary baha berdi we hyzmatdaşlygyň mundan beýläk-de ösdürilmegini goldaýandygy barada aýtdy. Şeýle hem ol Birleşen Arap Emirlikleriniň belli nebitgaz kompaniýalary, ugurdaş uniwersitetleri, hususan hem ýurduň nebitgaz pudagy üçin hünärmenleri taýýarlaýan Halifa uniwersiteti barada maglumatlar bilen tanyşdyrdy hem-de ylym-bilim ulgamynda bu kompaniýalar we uniwersitetler bilen hyzmatdaşlygy ýola goýmakda goldaw bermäge taýýardygyny belledi.

    Türkmenistan bilen Birleşen Arap Emirlikleriniň arasynda açyklyk, birek-birege hormat goýmak we düşünişmek ýörelgelerine esaslanýan döwletara gatnaşyklary uzak möhletleýin hem-de köpugurly häsiýete eýe bolup, özara hyzmatdaşlygy yzygiderli ösdürilýär hem-de pugtalandyrylýar, doganlyk halklaryň bähbidi üçin täze many-mazmun bilen baýlaşdyrylýar.

    Duşuşykda Türkmenistan bilen Birleşen Arap Emirlikleriniň arasyndaky hyzmatdaşlygy ösdürmek üçin uly tagallalary edýän Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň, Hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak, belent başlarynyň aman bolmagy arzuw edildi.