Ýagşygeldi Kakaýew adyndaky Halkara nebit we gaz uniwersitetiniň Balkanabat bölümin Nebitsenagaty fakulteti 2012-nji ýylda döredildi.
Fakultetde Geologiýa we geofizika, Nebitsenagat enjamlary, Nebit we gaz guýularyny burawlamak, Himiýa we energetika hem-de Umumy tehniki dersler kafedralary hereket edýär. Fakultetde “Peýdaly magdanlary gözlemegiň we barlamagyň geofiziki usullary”, “Nebitiň we gazyň geologiýasy”, “Nebit we gaz guýularyny burawlamak”, “Nebit-gaz känlerini özleşdirmek we ulanmak” hünärleri boýunça dag inženerleri, “Nebitgazgeçirijilerini we nebitgazyň saklanýan ýerlerini taslamak, gurmak we ulanmak” hünäri boýunça inžener-mehanikler, “Elektrik üpjünçiligi” hünäri boýunça inžener-elektrikler, “Senagat desgalarynyň we tehnologik toplumlaryň elektrohereketlendirilişi hem-de awtomatikasy” hünäri boýunça inžener-elektromehanikler, “Nebiti we gazygaýtadan işlemegiň himiki tehnologiýasy” hünäri boýunça inženerhimik-tehnologlar hem-de “Elektroenergetika we elektrotehnika” taýýarlyk ugry boýunça bakalawrlar goýberilýär. Olar okuwy tamamlanlaryndan soňra Türkmenistanyň Nebitgaz toplumynyň “Türkmengaz”, “Türkmennebit” döwlet konsernlerinde, “Türkmengeologiýa” döwlet korporasiýasynda hem-de “Türkmenhimiýa” döwlet konserninde, ylmy-barlag institutlarynda, degişli pudaklaýyn dolandyryş edaralarynda zähmet çekýärler.
“Türkmennebit” döwlet konserniniň “Nebitgazylmytaslama” institutynda Nebitsenagaty fakultetiniň kafedralaryna degişli “Nebitgaz we himiýa tehnologiýasy” binýatlyk kafedrasy hereket edýär.Talyplar bu kafedrada nazaryýetde alan bilimlerini önümçilikde pugtalandyrýarlar, ylmy-barlag we taslama işlerine işjeň gatnaşýarlar.
Fakultetde ylmyň ileri tutulýan ugurlary boýunça ylmy-barlag işleri ýerine ýetirilýär. Türkmenistanyň Nebitgaz toplumyny ösdürmegiň 2019-2025-nji ýyllar üçin Maksatnamasyny hem-de Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasyny durmuşa geçirmek boýunça ýerine ýetirilmeli çäreleriň meýilnamasynda göz öňünde tutulan ylmy-barlag işlerinden fakultetiň kafedralarynda “Nebitgaz känlerini sanly intellektual tehnologiýanyň kömegi bilen özleşdirmek we dolandyrmak”, “Günbatar Türkmen çöketliginde uglewodorod serişdeleriniň gorlaryny artdyrmak maksady bilen täze senagat barlaglaryň ähmiýeti”, “Kese we has ýapgyt gazylýan guýularyň geofiziki barlag iş tilsimatlary”, “Deňiz ýalpaklygynda ýerleşýän günbatar Çeleken meýdançasynda kenardan ulanyş guýusyny burawlamagyň tehnologiki aýratynlyklaryny seljermek”,“Nebiti we gazy daş aralyga daşamak üçin taýýarlamak”, “Rezerwuardaky nebitiň mukdaryny ölçemekde we hasaba almakda kämilleşdirilen tehnologiýalary ulanmak” temalary boýunça ylmy-barlag işleri alnyp barylýar.
Dünýä tejribesinden ugur alnyp, ýurdumyzda geljegi uly bolan deňizde nebitgaz senagatynyň ösmegi bilen, nebiti we gazy çykarmagyň tehnikasynyň hem-de tehnologiýasynyň esaslary öwredilýän “Deňizde nebit we gaz desgalarynyň tehnikasy we tehnologiýasy”, “Deňizde nebit, gaz känlerini özleşdirmegiň tehnikasy we tehnologiýasy”, “Türkmenistanyň dag-geologiýa we deňiz şertlerinde burawlamagyň aýratynlygy”, “Deňizde nebit, gaz guýulary burawlananda çylşyrymly ýagdaýlar we awariýalar” ýaly okuw dersleri boýunça “Nebit we gaz guýularyny burawlamak” hünäriniň talyplaryna ulgamlaýyn bilim berilýär. Hazar deňzinde nebiti we gazy çykarýan Petronas Carigali (Turkmenistan) Sdn Bhd daşary ýurt kompaniýasynyň önümçilik obýektlerinde talyplar önümçilik tejribeligini geçýärler.
Nebitsenagaty fakultetiniň okuw binasynyň okuw otaglary häzirki zaman enjamlary bilen enjamlaşdyrylan. Fakultetde diplom we ýyllyk taslamalary, kompýuter we maket otaglary hem-de 5 sany okuw we ylmy-barlag işlerini alyp barmaga niýetlenilen tejribe hanalar bar.
Nebitsenagaty fakultetinde Gahryman Arkadagymyzyň eserlerini, Hormatly Prezidentimiziň içeri we daşary syýasatyny öwrenýän, olary wagyz edýän, şeýle hem multimedia enjamlary arkaly ýurdumyzyň nebit we gaz senagatynyň ösüşlerini öwrenýän ylmy gurnaklar hereket edýär.
Fakultetiň professor-mugallymlarynyň we talyp ýaşlarynyň alyp barýan ylmy-barlag işleriniň netijeleri tezisler we makalalar görnüşinde ýerli hem-de daşary ýurt žurnallarynda çap edilýär.
Şeýle hem, fakultetiň professor-mugallymlary we talyp ýaşlary halkara we döwlet derejesinde geçirilýän çarelere işjeň gatnaşýarlar.