Türkmenistanyň Prezidenti hormatly Serdar Berdimuhamedowyň parasatly içeri we daşary syýasaty, durmuşa geçirýän döwrebap özgertmeleri, il-ýurt bähbitli, halkara ähmiýetli taslamalary, halkara hyzmatdaşlygynyň uzak geljegini nazarlaýan täzeçe ynsanperwer çemeleşmeleri netijesinde Türkmenistan Watanymyzyň, merdana halkymyzyň abraý-mertebesi dünýäde has-da belende galýar.

    Hormatly Prezidentimiziň Hytaý Halk Respublikasyna amala aşyran döwlet saparynyň dowamynda 2023-nji ýylyň 6-njy ýanwarynda kabul edilen Türkmenistanyň we Hytaý Halk Respublikasynyň Bilelikdäki Beýannamasynda “Lu Ban ussahanasy” taslamasyny bilelikde amala aşyrmagy ilerletmek baradaky teklip öňe sürüldi.

    Şunuň bilen baglylykda, Ýagşygeldi Kakaýew adyndaky Halkara nebit we gaz uniwersitetiniň rektory Hytaý nebit uniwersitetiniň, Sian nebit uniwersitetiniň we Hebeý nebit hünär-tehniki uniwersitetiniň arasyndaky hyzmatdaşlygy ösdürmek meselelerini ara alyp maslahatlaşmak üçin 2024-nji ýylyň 16-20-nji oktýabry aralygynda Hytaý Halk Respublikasynyň Pekin we Sian şäherlerinde gulluk iş saparynda boldy.

    2024-nji ýylyň 17-nji oktýabrynda Sian nebit uniwersitetinde uniwersitetiň professor-mugallymlary we talyplary bilen duşuşyk gurnaldy. Duşuşykda uniwersitetiň rektory Hormatly Prezidentimiziň öňdengörüjilikli we parasatly baştutanlygynda ykdysadyýetimiziň ähli pudaklary bilen bir hatarda ýurdumyzyň nebitgaz we bilim ulgamynyň maddy-enjamlaýyn binýadynyň yzygiderli pugtalandyrylýandygy, sanly bilim ulgamynyň ösdürilýändigi hem-de uniwersitetiň gurluşy, okuw we alnyp barylýan ylmy işler we ýetilen sepgitler barada tanyşdyryş bilen çykyş etdi. Duşuşykda “Lu Ban ussahanasynda” alnyp barylmagy meýilleşdirilýän okuw we ylmy-barlag işleri, taýýarlanyljak bakalawr taýýarlyk ugurlary, ussahanada gurnaljak enjamlar ara alnyp maslahatlaşyldy.

    2024-nji 18-nji oktýabrynda Türkmenistanda Lu Ban ussahanasyny döretmek hakynda Ýagşygeldi Kakaýew adyndaky Halkara nebit we gaz uniwersitetiniň, Sian nebit uniwersitetiniň, Hebeý nebit hünär-tehniki uniwersitetiniň, Hytaýyň Milli Nebitgaz Korporasiýasynyň we Hytaýyň bilim ulgamynda halkara alyş-çalyş assosiasiýasynyň arasynda özara düşünişmek hakynda Ähtnama 5 taraplaýyn gol çekildi, şeýle hem, hyzmatdaşlygyň ugurlary ara alnyp maslahatlaşyldy.

    Gulluk iş saparynyň çäklerinde 2024-nji ýylyň 19-njy oktýabrynda Pekin şäheriniň Hytaýyň nebit uniwersitetiniň okuw binalary, döwrebap tejribehanalary, ylmy-okuw işleriniň alnyp barlyşy, okuw maksatnamalary, okuw meýilnamalary bilen tanyşlyk gurnaldy. Şeýle hem, uniwersitetiň taryhy muzeýine gezelenç gurnaldy hem-de uniwersitetiň döreýşi hem-de ýetilen sepgitler bilen tanyşdyryldy. Soňra ylym-bilim ulgamynda özara düşünişmek hakynda baglaşylan Ähtnamanyň çäklerinde alnyp barylýan işleriň gerimini giňeltmek we ilerletmek maksady bilen, uniwersitetiň rektory Hytaýyň nebit uniwersitetiniň rektory we professor-mugallymlary bilen duşuşdy. Duşuşykda Ýagşygeldi Kakaýew adyndaky Halkara nebit we gaz uniwersiteti, Hytaýyň nebit uniwersiteti hem-de Hytaýyň Bilim ministrliginiň Hytaý-daşary ýurt dilleri alyş-çalyş we hyzmatdaşlyk merkezi tarapyndan bilelikde işlenilip taýýarlanylan Türkmen-Hytaý energetika okuw merkezini döretmek barada Ylalaşygyň hem-de “Iki diplom” halkara bilim maksatnamasy hakynda Düzgünnamanyň taslamasy we merkeziň okuw meýilnamalary ara alnyp maslahatlaşyldy.

    Bize daşary ýurtlaryň abraýly ugurdaş ýokary okuw mekdepleri, kompaniýalary, ylmy-barlag merkezleri bilen ylym-bilim ulgamynda hyzmatdaşlyk etmek hem-de tejribe alyşmak boýunça döredýän mümkinçilikleri üçin Arkadagly Gahryman Serdarymyza we Gahryman Arkadagymyza köp sagbolsunlarymyzy aýdýarys. Goý, Hormatly Prezidentimiziň, Gahryman Arkadagymyzyň janlary sag, ömürleri uzak, Belent başlary aman bolsun, il-ýurt bähbitli, döwlet ähmiýetli alyp barýan işleri hemişe rowaçlyklara beslensin!