2025-nji ýylyň 11-nji fewralynda Yagşygeldi Kakaýew adyndaky Halkara nebit we gaz uniwersitetiniň Kompýuter-hasaplaýyş merkeziniň binasynda Ýewropa Bileleşiginiň Erasmus+ maksatnamasynyň çäklerinde durmuşa geçirilýän "Daşky gurşaw meselelerini, durmuş zerurlyklaryny we ýokary dolandyrylyşy Merkezi Aziýanyň bilim we iş üpjünçiligi ulgamlarynda göz öňünde tutmak" (ESGCA) atly taslamanyň ilkinji duşuşygynyň netijelerine bagyşlanan tegelek stol geçirildi. Taslama boýunça ilkinji duşuşyk 2025-nji ýylyň 21-23-nji ýanwary aralygynda Genuýa uniwersitetinde (Italiýa) geçirildi we oňa taslamanyň çägindäki ähli hyzmatdaş uniwersitetleriň we guramalaryň wekilleri işjeň gatnaşdylar.

Tegelek stola Yagşygeldi Kakaýew Halkara nebit we gaz uniwersitetiniň professor-mugallymlary, hünärmenleri we talyplary gatnaşdylar. Olar Kiberhowpsuzlyk kafedrasynyň uly mugallymy, tehniki ylymlaryň kandidaty M.Çüriýewiň we Kompýuter-hasaplaýyş merkeziniň direktory M.Saparowyň çykyşlaryny diňlediler. Taslama boýunça ilkinji duşuşyga gatnaşan mugallymlar 2025-nji ýylyň ýanwar aýynda Italiýanyň Genuýa uniwersitetine gurnalan iş saparynyň netijeleri barada gürrüň berdiler.

M.Çüriýew öz çykyşynda Erasmus+ maksatnamasynyň çäklerinde durmuşa geçirilýän ESGCA taslamasy we Genuýa şäherine amala aşyrylan iş saparynyň netijeleri barada gysgaça maglumat berdi. Ol tegelek stola gatnaşyjylara ilkinji duşuşykda öňde goýlan wezipeler, tabşyryklar we olary ýerine ýetirmek meseleleri barada aýdyp geçdi. Taslama boýunça öňde goýlan wezipeleri durmuşa geçirmek maksady bilen uniwersitetiň rektorynyň buýrugy esasynda ýörite iş topary döredildi.

Ilkinji duşuşykda ESG magistr maksatnamasyny işläp düzmeklik esasy wezipe hökmünde bellenildi. Şol maksat bilen, 2025-nji ýylyň ilkinji ýarym ýylynda birnäçe okuw-türgenleşikleriniň geçirilmegi kesgitlenildi. Taslamanyň guramaçylary tarapyndan ýakyn wagtlarda aşakdaky üç sany okuw türgenleşigini geçirmeklik meýilleşdirilýär:

Okuw türgenleşiklerini geçirmek we degişli enjamlary satyn almak üçin taslamanyň maliýe serişdeleriniň möçberi hem kesgitlenildi.

M.Saparow ESGCA taslamasynyň https://esgca-erasmus.com salgy boýunça ýerleşedirilen resmi web-saýtynyň döredilendigi barada habar berdi. Ol tegelek stola gatnaşyjylary alnyp barylýan işler barada web saýtda giňden çykyş etmäge we bu işler barada professor-mugallymlary we talyplary ýakyndan tanyşdyrmaklyga çagyrdy. Sebäbi bu taslama halkara hyzmatdaşlygynyň aýdyň mysalydyr.

Ilkinji maslahatda ESG magistr maksatnamasynyň deslapky taslamasy hem hödürlenildi. Maksatnama 2 ýyl dowam edip, 120 kreditden ybaratdyr.

Çykyşlardan soň, taslama boýunça ýakyn wagtda ýerine ýetirilmeli işler ara alnyp maslahatlaşyldy, öňde durýan işler we olaryň netijeli ýerine ýetirilmegi üçin wezipeler kesgitlenildi. Döredilen iş toparynyň agzalarynyň anyk wezipeleri bellenildi hem-de ýerine ýetirmeli işleriň meýilnamasy düzüldi.

Ýagşygeldi Kakaýew adyndaky

Halkara nebit we gaz uniwersiteti